كلمات اغنية انسام الهبايب لـ خالد ال بريك
هبت انسام الهبايب وانا راعي هباب
واضهرت خافي ضميري بدون مقدمه
المطر والنار والبن الاشقر والضباب
تلهم اللي ما لتفت في عيون الملهمه
وش تساوي ريحة الكيف مع ريح الخضاب
في يمين اللي ورى بشت ابوها مكرمه
ما يقند راسي الا معاميل الزهاب
قد تعبنا من نزيف الجروح المؤلمه
راح وجهن مايزين حياه الا الحجاب
وانكسر قلبٍ من الشوق قد راح فحمه
ويش عذر المسلم اللي لعب فيه الغياب
غير جرحٍ ماسلم من غياب المسلمه
آه يا طيش المجانين وايام الشباب
مير دونه حكم دوله وقاضي محكمه
يالله بليلٍ يقض المسايل والشعاب
والرعد مابين لجه وحنه ورزمه
في مرابي فاطرن مايعذربها العياب
لا خطفها الصوت جاتك شليل ودرهمه
عوضتني عن عذاب المراهيف العذاب
وابعدتني عن طروق الغيا والسلهمه
كل ماصديت معها تماكنت الصواب
قبل لا يصعب علاجه ويصعب مرهمه
اتعزب مع طرفها لازاد ولا شراب
غير درِّن ياخذ سبوع ماضاع طعمه
مير لامن جات دعوة عزيز الجناب
يرجع الشاعر لحبره وفكره وقلمه
ياحرٍ من قمة النير اخذ رد الكتاب
واطرق ابواب الملاحم واصطر ملحمه
رزها في القمه اللي يعانقها السحاب
وخلها بيضاً اتدف الليال المضلمه
في حجا فروخ القرانيس وفروخ العقاب
واشهبن دوبه من الجوع يرتد انسمه
لا قلطنا يابس الصيد في حلوق الذياب
وان هرجنا يجفل الذيب ويسكر فمه
سم ياعايض سلايل مروين الحراب
واستلم ترسانة الادهم اللي بشحمه
خل وجه الليل يقدح مثل قدح الشهاب
لين من قطم العباريد ياخذ مقسمه
انت ذخر اللي على اسمه يساقن الركاب
غازي اللي ماتلوى على عرق رخمه
ماوراه الا المجوخ ومصقول النصاب
عزوتن بالسيف الاملح تقص الجمجمه
شايبن في واجب البل تغرب لين شاب
خل شاوين على الدرب يحتاش غنمه
مايوالي غير سودن مورشعها الصهاب
لا قبلت كن اشهب القاع غاشيه ضلمه
لا شملت من يم فيحان لاهاك التراب
ولا جنبت بين المشاقيق وعبال سحمه
ماتوهق في الحظاره وتصوير السناب
ولا وقف قدم المرايه يعدّل مرزمه
يضرب الدار الخليّه عتش والا صلاب
ويتوسد بندقه ويتلحف محزمه
من تعنّز في رجاء مارجاء غير الثواب
لابتن حازت من المجد ناره وعلمه
وكل قاتوله نهار المقاتل مايهاب
يرجع لساسه وساس القواتيل دهمه
الحمايا عندهم في خطا ولاّ صواب
يلزم الرجال وجهه ودمه ولحمه
والبقوم اهل المكارم مطوعت الصعاب
الفعول مدسمه والصحون مدسمه
يرعبون اللي من الطيش مايحسب حساب
والمفوه في نحاهم يجي فيه طرمه
ضربهم في اهل الطرابيش صوطن من عذاب
مايبي في معجم الترك شرح وترجمه
هم سهوم الموت ماهم سهوم الاكتتاب
لا احتمى الميقاف كلن يورّد بسهمه